Насилството во Македонија не стивнува: Девет пријави за физички напади во Скопје и Тетово

Повеќе случаи на физички напади биле пријавени во Тетово и Скопје, а полицијата поднела и неколку кривични пријави против лица осомничени за насилство.

СВР Тетово поднело кривични пријави против пет лица во три одделни случаи. Двајца тетовци на возраст од 19 и 36 години се сомничат дека на 20 јули 2026 година физички нападнале 24-годишен сограѓанин. Во друг случај, двајца жители на Мала Речица, на возраст од 45 и 49 години, се пријавени за напад врз 25-годишен жител на истото село, што се случил на 7 август.

— реклама —

Кривична пријава е поднесена и против 25-годишник од тетовското село Урвич, кој, според пријавата, на 14 јуни во семејниот дом физички нападнал 50-годишна жена од Косово, ангажирана како негувателка на неговата болна мајка. Сите петмина се пријавени за кривично дело „насилство“.

Во Скопје, пак, во текот на 9 ноември биле пријавени повеќе физички напади на различни локации.

— реклама —

Два од пријавените случаи се однесуваат на инцидент пред казино во општина Гази Баба. Четириесетгодишен скопјанец пријавил дека околу 23:40 часот бил нападнат од две лица, додека претходно, во 23:15 часот, 34-годишен скопјанец пријавил дека на истото подрачје бил физички нападнат од 40-годишниот маж. Полицијата работи на расчистување на околностите.

— реклама —

Физички напади биле пријавени и во централното градско подрачје, каде што 41-годишен жител на Куманово пријавил дека бил нападнат од едно лице, како и во Ѓорче Петров, каде што 39-годишен скопјанец пријавил напад од свој врсник.

Во Кисела Вода, 33-годишна жена пријавила дека била физички нападната од својот 27-годишен партнер. Во друг случај, 22-годишен кумановец пријавил дека бил нападнат на бензинска пумпа во општина Аеродром од 61-годишен вработен во објектот.

— реклама —

Дополнително, 27-годишно лице пријавило дека на 7 ноември било физички нападнато на подрачјето на Карпош од 40-годишно лице.

Од МВР информираат дека се преземаат мерки за расчистување на случаите, а по целосното документирање ќе следуваат соодветни поднесоци.