Претседателот на СДСМ, Венко Филипче, на денешната прес-конференција ја обвини власта за лицемерие во однос на европската интеграција на државата, тврдејќи дека голем дел од функционерите на ВМРО-ДПМНЕ и нивните семејства веќе имаат европски пасоши, додека на граѓаните им се нуди неизвесност и долгорочно чекање надвор од Европската Унија.
На денешната прес-конференција, Филипче изјави дека посетата на претседателот на Европскиот совет, Антонио Кошта, уште еднаш потврдила дека уставните измени се единствениот услов за продолжување на евроинтегративниот процес на Македонија.
Според него, сите најави за дополнителни гаранции, промена на преговарачката рамка или уставни измени со одложено дејство се покажале како неосновани.
„Вистината излезе на виделина. Нема дополнителни гаранции, нема нови услови, постојат само уставните измени“, рече Филипче.
Лидерот на СДСМ оцени дека ветувањата на власта во врска со подобрување на преговарачката позиција на државата не се реализирале и дека јавноста била доведена во заблуда.
Тој истакна дека не може да се зборува за патриотизам додека, како што наведе, дел од носителите на власта располагаат со европски пасоши, а истовремено ги убедуваат граѓаните дека земјата може да чека со децении надвор од ЕУ.
Филипче дополнително обвини дека вистинската причина за отпорот кон уставните измени не е заштитата на националниот идентитет, туку стравот од европските механизми за владеење на правото, независно судство и поголема институционална контрола.
„Европа носи европско судство, европско обвинителство и одговорност“, изјави Филипче, додавајќи дека СДСМ останува на ставот дека внесувањето на малцинствата во Уставот е неопходен чекор за продолжување на европскиот пат на државата.
