„Грокипедија“, енциклопедијата базирана на вештачка интелигенција што ја лансираше Илон Маск, почесто се потпира на десничарски извори при обработка на чувствителни теми отколку Википедија, покажува ново научно истражување.
Студијата, спроведена од истражувачи од Trinity College во Даблин и Технолошкиот универзитет во Даблин, анализирала речиси 18.000 најуредувани страници на англиската Википедија и ги споредила со еквивалентните статии на „Грокипедија“, која компанијата xAI на Маск ја покрена во октомври минатата година.
Според резултатите, статиите за религија, историја, книжевност и уметност на „Грокипедија“ значително почесто цитирале десничарски медиуми во споредба со Википедија.
Истражувањето покажало дека иако двете енциклопедии генерално имаат слични политички тенденции, постојат значајни разлики во начинот на обработка на содржините.
Дури две третини од анализираните статии на „Грокипедија“ биле значително изменети и користеле помал број извори од соодветните страници на Википедија.
Наодите се надоврзуваат на претходно истражување од јануари, кое исто така предупредило дека содржините за контроверзни теми на „Грокипедија“ можат да фаворизираат десничарски ставови.
Во меѓувреме, Европската комисија во јануари отвори истрага против компанијата xAI според Законот за дигитални услуги (DSA), за да утврди дали платформата ширела нелегални содржини во Европската Унија, меѓу кои и манипулирани сексуално експлицитни фотографии.
Авторите на студијата предупредуваат дека системите базирани на генеративна вештачка интелигенција можат да го преобликуваат јавното знаење на начин што е многу помалку транспарентен од класичните уредувачки процеси.
„За разлика од Википедија, каде пристрасностите се видливи и корисниците можат да ги оспорат и коригираат, системите генерирани од вештачка интелигенција функционираат на главно нетранспарентен начин“, изјави главната авторка на студијата, Саиде Мохамади.
Според неа, тоа значи дека промени во ставовите или изворите можат да се случуваат без одговорност или уреднички надзор.
Истражувачите предупредуваат и на ризикот од ширење дезинформации преку AI-системите, слично на проблемите што веќе се појавија на социјалните мрежи, каде ограничениот уреднички надзор придонесе за ширење лажни информации со последици врз избори, јавно здравје и општествена стабилност.
„Нашата информативна средина брзо се менува. Сведоци сме на огромна трансформација на информациите во ‘црната кутија’ на големите јазични модели, процес што останува главно скриен од јавноста“, изјави професорот Таха Јасери од Trinity College во Даблин.
