Претседателот на СДСМ, Венко Филипче, на денешната прес-конференција побара премиерот Христијан Мицкоски и ВМРО-ДПМНЕ да им се извинат на семејствата на 14-те загинати во пожарот во модуларната болница во Тетово, откако Обвинителството донесе одлука да го затвори предметот за набавката на модуларните болници.
Филипче оцени дека со одлуката на Обвинителството се потврдува оти во случајот нема злоупотреба на службената должност и нема финансиска штета за буџетот. Според него, со тоа се демантираат тврдењата кои, како што рече, пет години биле упатувани кон него.
„Барам организираната криминална група ВМРО да се извини. Не мене да ми се извини, да се извини криминалната група и Христијан Мицкоски да се извини на семејствата на загинатите. Затоа што пет години си поигруваат со нивните чувства, со нивните емоции и со нивната жал“, рече Филипче.
Тој посочи дека по трагедијата во Тетово поднел оставка, оценувајќи го тоа како морален и човечки чин.
„Јас после пожарот во Тетово поднесов оставка, како морален човечки чин“, рече Филипче, додавајќи дека не сака да прави споредби со други случаи и трагедии.
Претседателот на СДСМ истакна дека одлуката на Обвинителството, според него, го потврдува начинот на кој ги извршувал функциите што ги имал.
„Обвинителството нема злоупотреба на службената должност, нема штета на буџетот и тоа го отсликува целокупното мое работење“, порача Филипче.
Тој обвини дека во изминатите пет години бил изложен на политички напади и дека бил нарекуван „убиец“ и споредуван со доктор Менгеле.
„На Христијан Мицкоски и на неговата организирана криминална група им требаше убиец. Пет години зборат за мене дека сум убиец, ме споредуваат со доктор Менгеле“, рече Филипче.
Според него, Мицкоски и ВМРО-ДПМНЕ треба да им се извинат и на граѓаните поради, како што обвини, ширењето невистини и користењето на трагедијата за политички пресметки.
