По завршувањето на летните одмори и почетокот на новата учебна година, зголемениот сообраќај на автопатите повторно ги става во фокус наплатните станици и функционирањето на електронската наплата на патарините.
Иако М-ТАГ и М-Кард се воведени за побрзо минување и намалување на метежот на наплатните рампи, дел од возачите и понатаму пријавуваат задржувања и проблеми при користењето на електронската наплата.
Од Јавното претпријатие за државни патишта (ЈПДП) велат дека системот М-ТАГ функционира, но дел од тешкотиите се должат на неправилно користење на уредот.
Од ЈПДП појаснуваат дека М-ТАГ треба да биде поставен на предвиденото место во возилото, на оригиналниот држач, за сигналот правилно да биде испратен и прочитан од системот на наплатната станица.
Доколку возачот го држи уредот во рака, наместо да биде поставен на соодветното место, постои можност сигналот да не биде регистриран. Во таква ситуација, возилото може веќе да биде евидентирано на лентата, што ја отежнува наплатата и може да наложи промена на лентата или дополнителни чекори.
Поради тоа, од ЈПДП апелираат корисниците на М-ТАГ да не го држат уредот во рака при минување низ наплатните станици, туку да го постават на оригиналниот држач во возилото.
Во меѓувреме, продолжува модернизацијата на наплатната станица Миладиновци, а од ЈПДП посочуваат дека активностите се одвиваат согласно со договорените услови.
Електронска наплата сè уште нема на наплатните станици во Тетово и Гостивар. И овие станици се предвидени за модернизација, а од ЈПДП најавуваат дека процесот ќе продолжи.
Според најавите на ЈПДП, целосната модернизација на наплатните станици со системите М-ТАГ и М-Кард треба да биде завршена со изградбата на Коридорот 8. Во претстојниот период, приоритет останува завршувањето на модернизацијата на станицата Миладиновци.
