Македонската уметница Стефанија Гаштарска, која веќе подолг период живее и твори во Русија, преку објава на социјалните мрежи упати апел за поголема поддршка и внимание кон културата и уметниците во Македонија.
Во својата објава, Гаштарска ја спореди положбата на уметниците во Русија со состојбата во земјава, посочувајќи дека таму културата има значајно место во општеството, додека во Македонија, според неа, сѐ почесто се занемарува значењето на уметноста.
Таа укажа на, како што наведе, запуштени театри, намалена продукција и недоволна грижа за достоинството на уметниците.
„Не молчете кога се гасат светлата на културата. Пишувајте, барајте, одете во театар, купете книга... не дозволувајте уметноста да умре“, порача Гаштарска.
Во својата порака таа истакна дека уметниците не се луксуз, туку чувари на колективната меморија и идентитетот на еден народ.
Нејзината објава предизвика реакции на социјалните мрежи, каде дел од граѓаните ја поддржаа пораката за поголемо вложување во културата.
