Обвинителката Ленче Ристовска не го крие разочарувањето од затарувањето за дел од обвинетите во случајот „Таргет-тврдина“ за прислушувањето, што му донесе и слобода на ексдиректорот на УБК, Сашо Мијалков. Таа посочува дека дел од обвинетите остсануваат во судница, а некои пак ќе треба да влезат - како што е Никола Груевски.
„Трошоците за кривичната постапка, што би рекла, трошоците што ги имале обвинетите за нивните адвокати, трошоците што настанале по повод вештачењето итн., сето тоа паѓа на товар на Буџетот и она што е најважно и лицата кои биле оштетени од незаконското прислушување и трошоците за нивно обесштетување повторно паѓаат на товар на државата“, вели Ристовска.
Елаборираше и кои трошоци ќе ги плаќа државата, за кои кажа дека не се мали.
„Ги вклучуваат и оние трошоци во постапка, ги вклучуваат и како што и веќе еднаш кажав, сите надоместоци што треба да им бидат обезбедени на лицата кои биле незаконски прислушувани за повреда на правата. Впрочем, нивните права биле повредени со незаконското прислушување и сега државата по принципот на објективна одговорност е таа која што треба да ги обесштети овие лица, односно товарот да падне на буџетот на државата и нема да има како државата потоа да биде обесштетена од лицата коишто навистина се одговорни директно за прекршување на правата на граѓаните“, додаде Ристовска.
