„Претрес со Ландов“ се враќа во среда, 23 септември, со четвртата сезона, која ќе трае во следните 11 месеци. Авторот и водител Кристијан Ландов, кој воедно е одговорен уредник на „Скопје1“, најавува уште подиректни разговори, нови репортажи и теми што ја отсликуваат реалноста во Македонија.
„Пред да ја почнеме сезонава на ‘Претрес’ во среда, знам неколку работи. Не се предадовме. Не се откажавме. Даваме максимум. Веруваме дека можеме. Што? Да бидеме уште поискрени. Подиректни. Реални. И да правиме помалку грешки, затоа што безгрешни нема“, порача Ландов.
Според него, бројните пораки и прашања од публиката за почетокот на новата сезона покажуваат дека очекувањата се големи.
„Ако сезонава ја цениме според прашањата ‘кога ќе почнете?’, пораките и дофрлањата ‘ајде почнувајте, нема што да се гледа’ – доаѓа нешто брутално добро“, вели Ландов.
Централната порака на четвртата сезона е „Спиете ли мирно?“, прашање што во следните 11 месеци ќе им биде поставувано на носители на јавни функции, уметници, јавни личности и граѓани.
„Наредните 11 месеци сите ќе ги прашаме: ‘Спиете ли мирно?’ Правораздавачи, политичари, музичари, јавни личности, луѓето на улица... А ќе ви донесеме и репортажи со кои ќе го отсликаме она што го живееме“, најави тој.
Ландов порачува дека успехот на „Претрес“ е резултат на поддршката од публиката и на работата на целиот тим.
„Ви благодарам вам што создадовте производ како ‘Претрес’. Јас сум само едно делче од сложувалката, а заедно ја создаваме целата слика“, порача Ландов.
Новата сезона почнува во среда, 23 септември, во 21 часот, а емисијата ќе се емитува во живо секоја следна среда.
