Претседателот на СДСМ, Венко Филипче, упати критики кон премиерот Христијан Мицкоски, оценувајќи дека Владата создава нереална слика за економската состојба, додека граѓаните, според него, се соочуваат со празни џебови, неизвесност и нови поскапувања.
„Премиерот единствено е добар во раскажување приказни, граѓаните не му веруваат. Тоа дека сме трета економија во Европа, дека тука тече мед и млеко... а граѓаните знаат дека не е така бидејќи фрижидерите се празни, а и џебовите. Доаѓаат тешки есенски денови. Не се знае која ќе биде цената на струјата, што ќе покрене нов бран поскапувања“, рече Филипче.
Тој оцени дека политичката изолација на државата ќе има сериозни последици врз нејзиниот развој и европската перспектива.
„Политичката изолација носи упропастување. Блокадата на европската иднина ризикува да останеме слепо црево на Балканот, Европа. Земја од која младите единствено ќе мислат како да се иселат и ќе сакаат да работат во европски развиени земји“, изјави лидерот на СДСМ.
Филипче на крајот порача дека, според него, „заложници сме на Христијан Мицкоски и неговата криминална група“.
