Најавената мерка за намалување на цените на основните прехранбени производи сè уште е во фаза на анализи, а кога тие ќе бидат завршени, јавноста ќе биде навремено информирана, изјави министерот за економија и труд, Бесар Дурмиши.
Одговарајќи на новинарско прашање дали евентуалните мерки би можеле да стапат во сила од септември, Дурмиши не прецизираше конкретен рок, посочувајќи дека владините анализи ќе покажат кои производи и во кој обем би можеле да бидат опфатени.
Во однос на минималната плата од 600 евра, министерот повтори дека тоа и понатаму останува прашање на договор меѓу синдикатите и работодавачите.
Запрашан како би се спровела евентуалната мерка за намалување на цените во услови на слободна пазарна економија, Дурмиши истакна дека постојат механизми што можат да се применат без да се нарушат пазарните принципи.
Претходно, премиерот Христијан Мицкоски најави дека ќе се прават детални анализи на цените на секој производ поединечно, а доколку има потреба, ќе се проверуваат и фактурите низ целиот синџир на снабдување – од добавувачите до трговските синџири.
Владата веќе одржа средба со претставници на најголемите трговски синџири, а најавени се и разговори со производителите, дистрибутерите и добавувачите.
