Екипите на работната единица „Паркови и зеленило“ при ЈП „Охридски комуналец“ и изминатата недела реализираа бројни активности за одржување и уредување на јавните зелени површини во градот и приградските населби.
Во пресрет на јубилејното 10. издание на спортската манифестација „Охрид трчат“, јавното претпријатие обезбеди логистичка поддршка и активно се вклучи во подготовките за настанот. Беа спроведени активности за чистење и косење на зеленилото покрај патеките по кои ќе се одвиваат трките, а најавена е и реализација на едукативната кампања „Чисто е убаво – селектирај“.
Во приградските населби екипите ги косеа тревните површини во селата Трпејца, Пештани и Елшани, додека во градското подрачје се интервенираше во паркот на улицата „Јане Сандански“, просторот кај касарната, патеката кај Калето на потегот од Грашница до Канео, како и на плажата Горица.
Покрај тоа, беа извршени активности за шишање на украсните растенија во бетонските жардиниери долж улицата „Булевар Туристичка“, а продолжи и редовното наводнување на зелените површини низ градот.
Од ЈП „Охридски комуналец“ посочуваат дека екипите и понатаму остануваат на терен со цел Охрид да биде чист, уреден и подготвен да ги пречека бројните посетители во текот на летната туристичка сезона.
