„Недостигаат 10 милијарди денари, исплатата на пензиите е доведена во ризик“, вели Филипче

Претседателот на СДСМ, Венко Филипче, денеска на прес-конференцијата изјави дека ребалансот на Буџетот отвора сериозни ризици за јавните финансии и предупреди дека исплатата на пензиите до крајот на годината е доведена во прашање.

— реклама —

На прес-конференција, Филипче рече дека во буџетот недостигаат околу 10 милијарди денари за редовна исплата на пензиите.

— реклама —

„Парите што се исплаќаат од Министерството за труд и социјална политика кон ПИОМ не се зголемени, а недостигаат 10 милијарди денари до крајот на годината. Исплатата на пензиите е практично доведена во прашање“, изјави Филипче.

Тој оцени дека ребалансот покажува сериозни недостатоци и во делот на социјалната заштита, наведувајќи дека и покрај дополнителните две милијарди денари, ќе бидат потребни уште три милијарди за да се покријат сите обврски до крајот на годината.

— реклама —

Според Филипче, тоа значи дека нема да има зголемување на поддршката за социјално ранливите категории, додека Владата, како што рече, не спроведува вистинска рационализација на трошењето и продолжува да ги намалува средствата за развојните политики.

— реклама —

Претседателот на СДСМ повтори дека ребалансот, според него, претставува признание за неуспешните економски политики на Владата и оцени дека граѓаните се соочуваат со повисоки цени, поголем буџетски дефицит и нови задолжувања, без подобрување на животниот стандард.