Министерот за транспорт, Александар Николоски, порача дека актуелната владина политика не предвидува продажба на државни имоти и јавни претпријатија, туку нивно зајакнување и модернизација. Тој посочи дека во минатото имало обиди и најави за приватизација на Македонска пошта, кои, како што рече, довеле до проблематични процеси и истраги.
„Политика на оваа влада е дека нема да продава државен имот и државни претпријатија. Јас кажав дека Мухамед Закири заврши осуден токму заради физибилити студии поврзани со, помеѓу другото, и приватизација на пошта, за други се водат истраги, тоа ние нема да го правиме, наша цел е да ја зајакнеме Македонска пошта, во моментов се работат и предлог законски измени коишто за брзо време ќе ги презентираме на јавноста, каде што ќе се избалансира пазарот, затоа што ако видите некаде над 75% од целокупниот промет во државата го прави Македонска пошта, но на страна на приходите е обратно, што значи дека либерализацијата на пазарот, наместо да создаде конкуренција, создаде монопол на приватните пошти, коишто ги земаат најпрофитабилните бизниси, коишто не се заинтересирани да носат писма од Скопје во Вевчани, на пример, а Македонска пошта останува како единствен провајдер на овие услуги и единствени коишто овозможуваат државата да функционира, и затоа наша цел е да ги зајакнеме, а не да ги продадеме, и втората наша цел е секако да се зголемува профитабилноста.
