Непријатен мирис и вкус на водата во Тетово, надлежните тврдат дека е безбедна

Жителите на Тетово повторно забележуваат непријатен мирис и вкус на водата од градскиот водовод, но надлежните уверуваат дека таа е безбедна за пиење и ги исполнува пропишаните критериуми.

— реклама —

Од Јавното комунално претпријатие „Шар“ информираат дека досегашните лабораториски анализи потврдиле исправност на испитаните примероци. Според нив, промените најчесто се јавуваат во есенските месеци, особено по обилни врнежи, кога лисјата и другите растителни материи од Шар Планина се разградуваат и дел од органските состојки стигнуваат до водните извори.

— реклама —

И од Центарот за јавно здравје во Тетово посочуваат дека водата редовно се контролира двапати дневно, од понеделник до петок. Специјалистот по хигиена и здравствена екологија, д-р Илија Иљоски, објаснува дека станува збор за појава што се повторува секоја есен. Според него, бактериолошките анализи покажуваат дека водата е исправна, иако се забележуваат помали отстапувања во физичко-хемиските параметри поради променетиот мирис и вкус.

Резултатите од најновите примероци, земени денес, се очекуваат во понеделник, бидејќи лабораториските испитувања траат неколку дена.

— реклама —

Проблемот е поврзан со водоводниот систем, кој пред околу десет години бил пуштен во употреба и зафаќа вода од реката Пена, кај месноста Лешница на Шар Планина. Бидејќи станува збор за отворен систем, во октомври и ноември, особено по силни дождови, паднатите лисја и другата вегетација можат да навлезат во него.

Водата потоа се прочистува во филтер-станицата кај селото Лисец, но карактеристичниот мирис и вкус не се отстрануваат целосно. Надлежните нагласуваат дека непријатниот мирис сам по себе не значи дека водата е небезбедна, туку нејзината исправност се утврдува со лабораториски анализи.