Прославата на победата на Париз Сен Жермен во финалето на Лигата на шампионите беше засенета од сериозни нереди низ Франција, при што се уапсени повеќе од 400 лица, а неколку полицајци се повредени во судири со навивачи.
Илјадници полицајци беа распоредени низ Париз и другите градови за да спречат ескалација на насилството, но и покрај тоа дојде до инциденти што го нарушија автобускиот, железничкиот и градскиот сообраќај.
По победата на ПСЖ, голем број навивачи се собраа на Шанзелизе, каде што беа забележани запалени бакли, огномети, уништен инвентар и искршени излози. Полицијата на неколку локации употребила солзавец за да ги растера насобраните групи.
Според француското Министерство за внатрешни работи, до раните утрински часови биле уапсени 416 лица, од кои 280 во Париз. Во нередите биле оштетени шест возила, два деловни објекти и едно автобуско стојалиште.
Министерот за внатрешни работи, Лоран Нунез, изјави дека седум полицајци биле повредени и ги осуди инцидентите како „апсолутно неприфатливи“.
На случувањата реагираше и лидерот на француската десница, Марин Ле Пен, која на социјалната мрежа Икс напиша дека само во Франција победа на фудбалски клуб може да предизвика вакви нереди и чувство на несигурност кај граѓаните.
И покрај инцидентите, за денеска е најавена победничка парада на фудбалерите на ПСЖ во Париз, која ќе вклучува дефиле кај Ајфеловата кула и прием кај францускиот претседател Емануел Макрон.
Ова е втора година по ред прославите поврзани со европскиот успех на ПСЖ да бидат проследени со насилство. И минатата година, по освојувањето на европската титула, во немирите загинаа две лица.
