Грчките власти издадоа итно предупредување поради опасни временски услови што ќе ја зафатат земјата, а Цивилната заштита го активираше системот за итни известувања 112, испраќајќи СМС-пораки до граѓаните и туристите.
Според најавите, циклонот ќе донесе обилни врнежи од дожд, силни грмежи и засилен ветер, а најкритичниот период се очекува од петок попладне до сабота наутро. На одредени туристички дестинации веќе се забележани и водени пијавици, како и силни налети на ветер.
На Халкидики, односно во Касандра, Ситонија и Атос, од петок наутро до доцна навечер се очекуваат интензивни врнежи, грмежи и можност за локална појава на град, додека ветерот во Солунскиот Залив ќе достигне до пет бофори.
Невремето ќе ги зафати и крајбрежните делови на Пиерија, вклучувајќи ги Паралија, Лептокарија, Неи Пори и Катерини, каде што се очекуваат обилни врнежи кои може привремено да го отежнат сообраќајот и да предизвикаат задржување вода на патиштата.
Во Солун нестабилното време со силен дожд се очекува во текот на петок попладне и навечер, а температурата ќе се спушти до околу 23 степени Целзиусови.
Под портокалова тревога се и островите Тасос, Самотраки и Лимнос. Главниот бран врнежи и силни ветрови таму се очекува доцна вечерта во петок и во текот на ноќта кон сабота. На туристите им се препорачува особено внимание при возење поради намалената видливост и силните налети на ветер.
Според грчките метеоролошки служби ЕМУ и Meteo.gr, постои опасност од силни грмежи, бурни налети на ветер кои можат да кршат гранки и да соборуваат полесни предмети, како и ризик од ненадејни поплави во крајбрежните области поради големото количество дожд за кратко време.
Синоптичарите најавуваат дека врнежите постепено ќе престанат во текот на сабота попладне, а од недела се очекува повторно стабилно, сончево и топло време низ цела Грција.
