СВР Тетово поднесе кривична пријава против И.Е. (42) и Ј.Е. (31), двајцата од село Пршовце, тетовско, поради сомнение за сторени кривични дела „злоупотреба на службена положба и овластување“ и „помагање“.
Според МВР, првопријавениот, вработен како оператор за внес на податоци во Центарот за социјални работи Тетово, во јуни и октомври 2022 година извршил незаконска исплата на парични средства во вкупен износ од 155.500 денари.
Средствата биле исплатени на име на второпријавениот, иако според решение биле наменети за друго лице кое остварувало право на социјална пензија.
Од МВР наведуваат дека првопријавениот незаконски го поврзал социјалниот број со трансакциската сметка на второпријавениот, со цел да се изврши неправилна исплата.
Второпријавениот, според пријавата, ги ставил на располагање своите лични податоци и банкарска сметка, со што овозможил противправно стекнување на парични средства, иако немал законска основа за нивно добивање.
