Новиот генерален секретар на СДСМ и досегашен министер за земјоделство, шумарство и водостопанство, Љупчо Николовски, не ја искористи апанажата, а донирал неколку илјади евра за децата од СОС Детско село.
– Изминатите две години, сите дневници за службени патувања Николовски ги донираше во СОС Детското село -известија од Министерството за земјоделство, пренесе Фокус.
Николовски вели дека тоа било чин кој што го направил од се срце.
-Некако се приврзав за СОС Детско село. Многу пати им бев во посета, ги засакав децата. Кога одам таму, се дружам со нив, и токму тие дружби со децата најмногу ме опуштаат.
Сите дневници започнав уште од лани таму да ги донирам. Кога го однесов првиот налог, во СОС Детско село на некој начин се збунија, не очекуваа нешто такво. На прашањето зошто го правам тоа, можам да кажам само дека среќата е многу поголема кога даваме, отколку кога добиваме. Барем за мене е така. Децата се богатсво и иднина, вели тој за Фокус.