Кривичниот суд во Скопје донесе одлука поранешните директори на Клиниката за онкологија, Нино Васев и Нехат Нухи, да бидат ослободени од притвор откако прифати гаранции обезбедени со хипотека на недвижен имот во вкупна вредност поголема од 500.000 евра.
Кривичниот совет при Основниот кривичен суд Скопје го уважил предлогот на одбраната за замена на мерката притвор со гаранција, а позитивно мислење за тоа дало и Јавното обвинителство.
За Нино Васев е определена гаранција во износ од 183.981 евра, додека за Нехат Нухи гаранцијата изнесува 348.049 евра. И во двата случаи гаранцијата е обезбедена преку ставање под хипотека на недвижен имот во корист на државата.
На обвинетите им се изречени и мерки на претпазливост, меѓу кои: забрана за напуштање на живеалиштето во Скопје, обврска еднаш месечно да се јавуваат во судот, како и привремено одземање на патните исправи и забрана за издавање нови документи за преминување на државната граница.
Судот при одлучувањето го зел предвид и фактот дека мерката притвор, определена од Апелациониот суд Скопје, согласно со законските одредби, можела да трае најдоцна до 18 јули 2026 година.
Откако Јавното обвинителство се откажало од правото на жалба, а понудените хипотеки биле впишани во Катастарот на недвижности, решенијата станале правосилни и двајцата обвинети биле пуштени да се бранат од слобода.
