Ниските водостоји на Рајна носат нов бран поскапувања во германскиот градежен сектор

Ниските водостоји на Рајна и другите германски реки сè повеќе го отежнуваат снабдувањето на градежниот сектор во Германија, предупредуваат претставници на градежната индустрија.

— реклама —

Намалениот капацитет на речниот транспорт предизвикува доцнења во испораките и ги зголемува трошоците за превоз и за градежните материјали. Особено проблематична е достапноста на песокот и чакалот, кои во големи количества се користат за производство на бетон.

„Превозот по река станува сè потежок“, изјави Томас Рајман, претседател на здружението што ги застапува градежните компании во германската покраина Хесен.

— реклама —

Според него, ниските водостоји отвораат простор за нов бран поскапувања, трет во последните неколку години, по енергетската криза предизвикана од војната во Украина и конфликтот со Иран. Тој предупреди дека дел од зголемените цени најчесто остануваат трајни.

— реклама —

Германската федерација на градежната индустрија предупредува и на можен недостиг на одредени материјали доколку ниските водостоји продолжат. Проблеми има со транспортот на битумен, агрегати, природен камен, гориво и минерален градежен отпад.

Дел од пратките може да се пренасочат кон железничкиот или патниот транспорт, но овие алтернативи се поскапи и имаат ограничен капацитет. Во крајни случаи би можеле да бидат потребни и дополнителни бродови.

— реклама —

Сепак, претставниците на индустријата засега не очекуваат поголеми застои во градежните работи, но предупредуваат дека ризикот од недостиг, повисоки трошоци за логистика и доцнење на испораките расте доколку ниските водостоји потраат подолго.