Емисијата „24 минути со Зоран Кесиќ“ најави дека новата сезона ќе започне на 19 септември, но засега останува неизвесно дали ќе се емитува и на телевизијата Нова С. Екипата на емисијата тврди дека и покрај потпишаниот нов договор од нивна страна, од новите сопственици од Португалија сè уште нема одговор.
Во објава на официјалниот профил на емисијата, екипата ја опиша ситуацијата преку песната „Фадо до Силенсио“ на Амалија Родригеш, поигрувајќи со значењето на зборот „фадо“, кој на португалски значи судбина.
Од емисијата велат дека новиот договор го потпишале уште во јуни, но дека тој станува валиден само кога ќе биде потпишан од двете страни. Од португалската страна, како што наведуваат, досега нема одговор.
„Нити пишуваат, ниту се јавуваат“, велат од екипата.
Планираниот почеток на новата сезона е 19 септември, а од „24 минути“ велат дека по сите обиди да добијат одговор, сè уште не знаат дали емисијата ќе продолжи на Нова С.
„Чему ‘Силенсио’?“ прашуваат од емисијата, додавајќи дека ги повикуваат гледачите, колегите од медиумите и сите што можат да помогнат да се прекине молкот од новите сопственици.
Во меѓувреме, екипата потврдува дека новата сезона ќе започне според планот, на 19 септември во 20:30 часот, преку официјалниот канал на емисијата на YouTube. Доколку биде постигнат договор, останува можност емисијата да се емитува и на Нова С.
Од „24 минути“ потсетуваат и на најавата на новите сопственици дека нема да подлегнуваат на политички и други притисоци, па ги повикаа јавно да кажат доколку постои таков притисок.
„Познато е дека на тишина никако не сме навикнати“, порачаа од емисијата, повикувајќи ја публиката да продолжи да ја следи новата сезона.
