Американската сојузна држава Њујорк воведе едногодишен мораториум за изградба на нови големи дата-центри за вештачка интелигенција, станувајќи првата држава во САД што донесе ваква мерка.
Гувернерката Кети Хокул потпиша извршна наредба со која се забранува изградба на нови дата-центри што трошат 50 или повеќе мегавати електрична енергија. Таа изјави дека ваквите објекти претставуваат сериозен товар за електроенергетската мрежа и придонесуваат за раст на сметките за струја кај граѓаните.
„Овие огромни дата-центри за вештачка интелигенција трошат огромни количини енергија и сериозно се закануваат да ја преоптоварат нашата мрежа. Не дозволувам тие трошоци да ги плаќаат жителите на Њујорк“, порача Хокул.
Според податоците на властите, цената на електричната енергија за домаќинствата во Њујорк од 2019 година пораснала за речиси 68 проценти, што дополнително ја засилило јавната поддршка за ограничување на изградбата на нови дата-центри.
Одлуката беше поздравена од еколошките организации, кои со години предупредуваат дека ваквите комплекси трошат огромни количини електрична енергија и вода, а можат да влијаат и врз квалитетот на воздухот и животната средина.
Сепак, дел од политичарите и претставниците на индустријата остро се спротивставија на мерката, оценувајќи дека таа ќе ги одврати инвестициите и ќе ја ослабне конкурентноста на Њујорк и на САД во трката за развој на вештачката интелигенција.
Анкета спроведена во јуни покажала дека 46 проценти од жителите на Њујорк го поддржуваат едногодишниот мораториум, додека 21 процент се против.
За време на мораториумот, државните власти треба да подготват нови правила за изградба на дата-центри, а гувернерката најави и разгледување на можноста овие компании сами да финансираат нови капацитети за производство на чиста енергија што ќе ги користат за своето работење.
