Ренџерската служба на Националниот парк „Пелистер“, во соработка со СВР Битола, спровела повеќечасовна акција за пронаоѓање лица вооружени со огнено оружје, кои навлегле длабоко во територијата на паркот.
Акцијата започнала на 12 август по 19 часот, по добиени информации од повеќе извори на терен. Во потрагата биле вклучени две патроли на НП „Пелистер“, поддржани од полициски службеници од СВР Битола.
Патролните тимови се движеле низ тешко пристапен терен на над 2.000 метри надморска височина, од две различни насоки – од селото Велушина и од Инфоцентарот. По повеќе од три часа пешачење, околу 23:30 часот, вооружените лица биле лоцирани во близина на Голема Грива, во зона на строга заштита.
Од моментот на нивното пронаоѓање, со понатамошните активности раководеле полициските службеници. Акцијата завршила во раните утрински часови на 13 август, кога лицата биле спроведени во полициска станица.
Од НП „Пелистер“ истакнуваат дека соработката со СВР Битола во заштитата и зачувувањето на природата е континуирана, особено поради тешко достапниот терен во делови од паркот.
Од установата посочуваат дека недостигот од соодветна инфраструктура го отежнува редовното патролирање, а дел од шумските патишта кои се важни за противпожарна заштита и работата на ренџерската служба со години се во лоша состојба. Во НП „Пелистер“ веќе се работи на нивно обновување.
Од паркот додаваат дека и покрај условите, во зоните со строга заштита навреме се спречуваат обиди за незаконски активности, во соработка со полицијата.
