Градоначалникот на Њујорк, Зохран Мамдани, најави отворање градски продавници за храна во сите пет градски општини, во кои основните прехранбени производи ќе се продаваат по цени до 30 отсто пониски од вообичаените малопродажни цени.
Станува збор за една од клучните мерки од неговата програма за намалување на трошоците за живот во еден од најскапите градови во САД. Првата продавница треба да биде отворена кон крајот на 2027 година во Бронкс, а до крајот на неговиот четиригодишен мандат се планира да функционира по една во секоја градска општина.
„Попуст од 30 проценти значи вистинска заштеда за њујорчани. Во најбогатиот град во најбогатата земја во светот, никој не треба да се грижи дали ќе може да го прехрани своето семејство“, изјави Мамдани.
Пониските цени ќе важат за основни производи како овошје, зеленчук, месо, морска храна, млечни производи, разладена храна и други прехранбени артикли. Цените ќе се утврдуваат еднаш месечно и ќе важат за сите купувачи, без оглед на нивните приходи.
Градот ќе обезбеди деловен простор и ќе ги покрие трошоците за закуп и данокот на имот, додека приватни оператори ќе бидат задолжени за секојдневното работење на продавниците.
Планот предизвика критики од дел од сопствениците на мали продавници, кои стравуваат дека нема да можат да конкурираат на објектите што ќе добиваат градска поддршка. Мамдани одговори дека градските продавници нема да продаваат топла храна, пиво и цигари, со цел да не им го преземат најпрофитабилниот дел од работењето на приватните трговци.
„Не сакаме да се натпреваруваме со малите продавници, туку да им обезбедиме на њујорчани подостапни основни прехранбени производи“, порача градоначалникот.
