Европската фудбалска унија (УЕФА) ѝ исплатила шестцифрена сума на поранешна вработена, за која извори на весникот „Телеграф“ тврдат дека била во наводна врска со тогашниот генерален секретар на УЕФА, Џани Инфантино, објави британскиот весник.
Според наводите на „Телеграф“, љубовницата за време на наводната врска била унапредена на раководна позиција, со зголемување на платата од околу 30 отсто, на повеќе од 170.000 евра годишно.
По нејзиното заминување од УЕФА, организацијата, според тие наводи, ѝ исплатила отпремнина и ги покрила трошоците за студирање на бизнис-школа, чија годишна школарина изнесувала околу 50.000 евра.
„Телеграф“ наведува, повикувајќи се на повеќе извори, дека тогашниот претседател на УЕФА, Мишел Платини, дознал за наводната врска и на Инфантино му дал избор меѓу останувањето на функцијата и заминувањето на вработената.
Според тие извори, било договорено жената да ја напушти УЕФА, со финансиски пакет.
УЕФА потврди дека на поранешната вработена ѝ била исплатена отпремнина и дека ѝ биле покриени трошоците за студирање, но наведе дека тие исплати биле во согласност со тогаш важечките правила за вработените кои ја напуштаат организацијата.
„Свесни сме за наводите и можеме да потврдиме дека на дотичната личност ѝ била исплатена отпремнина, заедно со исплата на школарината за курс во локална бизнис-школа“, соопшти портпаролот на УЕФА.
ФИФА, сепак, ги отфрли наводите за несоодветно однесување на Инфантино.
„Претседателот на ФИФА Џани Инфантино остро ги негира овие наводи и тие се категорично неточни. Секоја инсинуација за несоодветно однесување или прекршување на статутот или прописите е клеветничка“, соопшти портпаролот на ФИФА.
ФИФА, исто така, наведе дека ниту еден вработен во УЕФА или ФИФА никогаш не поднел жалба во врска со однесувањето на Инфантино и дека сите одлуки во врска со вработените, вклучително и заминувањата и отпремнините, биле одобрувани од надлежните раководители во согласност со тогаш важечките прописи.
„Телеграф“ наведе и дека наводната љубовница во УЕФА првично работела на административна позиција, а подоцна напредувала до менаџерска функција.
Според извори на весникот, по заминувањето од УЕФА, Инфантино наводно ѝ помогнал да добие ново работно место во слична област. Весникот наведува и дека нејзиното брзо напредување и односот со Инфантино предизвикале загриженост кај дел од вработените во УЕФА поради можен судир на интереси и злоупотреба на положбата.
Инфантино во УЕФА дошол во 2000 година, а генерален секретар станал во 2009 година. Организацијата ја напуштил во 2016 година, кога бил избран за претседател на ФИФА, по суспензијата на тогашниот претседател Мишел Платини.
„Телеграф“ наведува дека неговата кариера сега добива нова димензија во светло на наводите за неговиот однос со поранешната вработена и начинот на кој нејзиното заминување од УЕФА наводно било регулирано.
Платини одбил да ги коментира наводите на британскиот весник. Притисокот врз Инфантино последниве недели се зголемува поради други спорни одлуки и потези на чело на ФИФА.
Според „Телеграф“, тој на своите соработници им порачал дека нема намера да поднесе оставка.
