Македонија и Турција отвораат ново поглавје во економската соработка со воспоставување директна авиолинија меѓу Скопје и Анкара, која ќе функционира без државни субвенции. Според надлежните, токму фактот што линијата ќе биде комерцијално одржлива е доказ за интересот на авиокомпаниите и потенцијалот на македонскиот пазар.
„Линијата се очекува да биде рентабилна. Анкара е административен центар на Турција, иако најголемиот дел од бизнис-активностите се концентрирани во Истанбул. Очекувам во наредниот период да имаме уште подобри резултати и натамошен раст на соработката“, беше истакнато во изјавата.
Покрај новата авиолинија, на бизнис-форумот во Истанбул било договорено и воспоставување карго-поврзување меѓу двете земји, со цел да се олесни транспортот на стоки и да се поттикне трговската размена. Иницијативата добива дополнително значење ако се има предвид стратешката позиција на Коридорот 10, кој претставува една од најкратките транспортни врски меѓу Турција и земјите од Централна Европа.
На форумот учествувале повеќе од 200 компании и претприемачи од двете држави, при што биле разгледани можности за нови инвестиции, заеднички проекти и проширување на деловната соработка.
Амбицијата на Македонија и Турција е актуелната трговска размена, која изнесува околу 900 милиони долари годишно, да достигне две милијарди долари во наредните години.
Турските компании покажуваат сериозен интерес за инвестирање во Македонија, особено поради поволниот географски положај и пристапот до европскиот пазар преку договорите за слободна трговија. Дел од инвеститорите веќе ја разгледуваат земјата како регионална база за проширување на своето присуство во Европа, што би можело да донесе нови работни места, инвестиции и дополнителен економски раст.
