Граѓанската иницијатива и советничка група во Општина Центар „Шанса за Центар“ предупредува дека Нацрт-деталниот урбанистички план (ДУП) за Барутана, кој е ставен на дневен ред на Советот, предвидува урбанизација на простор за кој, според нив, постојат сериозни ризици од ерозија.
Од иницијативата посочуваат дека просторот на Водно, познат како Барутана, според Планот за енергија и клима на Општина Центар е означен како подрачје загрозено од ерозија, со препорака да се пошумува, а не да се градат станбени објекти. Тврдат дека и во проектната програма за изработка на ДУП-от е наведено дека опасноста од ерозија треба да биде задолжително обработена во планската документација.
Според „Шанса за Центар“, во предложениот план не се предвидени мерки за заштита од ерозија, шумски пожари и поројни поплави, и покрај тоа што, како што наведуваат, во минатото веќе имало случаи на лизгање на земјиштето на падините на Водно.
Тие додаваат дека со планот се предвидува изградба на нови објекти на стрмен терен, што, според нив, отвора дополнителни ризици. Воедно, тврдат дека иницијативата за планот потекнува од приватна компанија која поседува земјиште во опфатот, а дел од површините што претходно биле наменети за државни институции сега се пренаменуваат за домување.
Од иницијативата посочуваат дека точката требало да биде разгледана на седницата на Советот во вторникот, но поради прекин на седницата, расправата ќе продолжи во наредниот период.
„Шанса за Центар“ бара Советот да не го поддржи предложениот ДУП, оценувајќи дека новите урбанистички планови треба да ги коригираат, а не да ги продлабочуваат проблемите со прекумерната урбанизација на градот.
