Ријад Махрез се најде во центарот на голем скандал откако неговата изјава по натпреварот меѓу Алжир и Австрија на Светското првенство повторно ги разгоре сомнежите дека мечот можеби бил договорен.
Натпреварот заврши со резултат 3:3, исход што им обезбеди пласман во осминафиналето на двете репрезентации. Сепак, драматичната завршница предизвика бројни реакции и сомнежи кај јавноста.
Махрез во 93. минута постигна гол за водство на Алжир од 3:2, резултат што ќе значеше елиминација за Австрија и потежок противник за Алжир во следната фаза, каде што потенцијално би се соочил со Шпанија.
Но, само неколку минути подоцна, во судиското продолжение, Австрија израмни на 3:3, а алжирската одбрана при тој погодок остави впечаток на пасивност.
Контроверзиите дополнително се засилија по објавувањето снимки на кои се гледа како соиграчите на Махрез реагираат незадоволно по неговиот гол за 3:2.
Во изјава за медиумите, алжирскиот фудбалер призна дека бил свесен за чувствителноста на ситуацијата.
„Ја ширевме играта, а тие се повлекуваа. Но, во еден момент добив топка низ средината и морав да трчам. Морам да го почитувам фудбалот. Знам дека беше малку срамно, но таков е фудбалот“, изјави Махрез.
Тој додаде дека на крајот најважно е што двете селекции обезбедиле место во следната фаза од натпреварувањето.
Изјавата на Махрез предизвика бурни реакции во спортската јавност, која сега уште погласно ги поставува прашањата за регуларноста на натпреварот.
