Нови судски документи објавени во Соединетите Американски Држави откриваат дополнителни детали за обвиненијата против Ендрју и Тристан Тејт, кои се товарат за силување, трговија со луѓе и други кривични дела. Браќата моментално се наоѓаат во притвор во Флорида, каде што се спротивставуваат на барањето на Велика Британија за нивна екстрадиција.
Според објавените документи, британските власти поднеле дополнителни обвиненија по искази на уште четири жени, со што вкупниот број обвиненија против двајцата достигна 59. Тие ги негираат сите наводи, а нивните адвокати најавија дека ќе се борат против екстрадицијата.
Во документите за Ендрју Тејт се наведуваат обвинувања дека во два одделни случаи, во 2014 и 2015 година, наводно давел жени и извршил силување. Дополнително, тој се соочува со уште седум обвиненија за силување, три за трговија со луѓе, три за физички напад и 19 обвиненија поврзани со недозволени фотографии од дете и екстремна порнографија. Вкупно, против него се водат 42 обвиненија.
Против Тристан Тејт, пак, се поднесени нови обвиненија дека повеќепати силувал жена со која бил во врска, како и дека физички ја малтретирал. Тој се соочува со две нови обвиненија за силување, едно за сексуален напад и три обвиненија за овозможување патување со цел експлоатација, со што вкупниот број обвиненија против него изнесува 17.
Британските обвинители наведуваат дека располагаат со искази од сведоци, електронски пораки и фотографии кои, според нив, ги поткрепуваат обвиненијата. Браќата Тејт и претходно ги отфрлаа сите обвинувања.
Тие беа уапсени во Романија во 2022 година во посебен случај поврзан со обвиненија за трговија со луѓе и организирана криминална група. Откако им беа ублажени ограничувањата за патување, отпатуваа во Флорида, каде што беа уапсени на 18 јули врз основа на британското барање за екстрадиција.
Постапката за екстрадиција сè уште трае. Во наредните недели американски федерален судија треба да одлучи дали се исполнети законските услови за нивно предавање на Велика Британија, додека конечната одлука ќе ја донесе американскиот државен секретар Марко Рубио. Дотогаш, Ендрју и Тристан Тејт остануваат во притвор.
