Нови фотографии од Ким Џонг-Ун по тврдењата дека починал

Нови фотографии од севернокорејскиот лидер Ким Џонг-Ун беа објавени од државните медиуми, откако на социјалните мрежи се проширија непотврдени тврдења дека починал од мозочно крвавење.

Според Корејската централна новинска агенција (KCNA), Ким на 19 октомври ја посетил Националната изложба на облека и обувки за 2026 година. На фотографиите тој разгледува детски обувки и женска облека, а со него се неговата сопруга Ри Сол-Џу и ќерката Ким Џу-Е, објави јужнокорејската агенција Јонхап.

— реклама —

Објавите следуваа по тврдењата на кинескиот дисидент Ванџун Сје, кој живее во САД, дека Ким доживеал тешко мозочно крвавење, паднал во кома и бил пренесен во Пекинг, каде што лекарите не успеале да го спасат. Според неговата верзија, телото на севернокорејскиот лидер потоа било тајно вратено во земјата.

— реклама —

Во исто време се појавија и непотврдени информации дека Кина испратила 9.000 војници во Пјонгјанг поради можна криза околу наследувањето на власта, како и дека сестрата на Ким, Ким Јо-Џонг, ја презела контролата во Северна Кореја.

За овие тврдења не беа приложени медицински документи, фотографии, сведоштва од именувани извори или други докази. Ниту Пјонгјанг ниту Пекинг не соопштија дека Ким бил хоспитализиран, починал или дека дошло до промена на власта.

— реклама —

Иако фотографиите ги објавија севернокорејските власти, независните новинари немале пристап до настанот, поради што не можеле самостојно да ги проверат околностите.

Гласините за здравјето на Ким периодично се појавуваат поради затвореноста на севернокорејскиот режим. Слични неточни информации се проширија и во 2020 година, по што лидерот повторно се појави во јавноста.

На 30 септември 2026 година, јужнокорејската разузнавачка служба проценила дека Ким има зголемен ризик од кардиоваскуларни заболувања поради дебелината, но тогаш не забележала значајни знаци на нарушено здравје.