Најмалку девет лица загинаа, а десетици се повредени во новите руски напади извршени во повеќе делови на Украина, соопштија украинските власти.
Најтешко погоден бил југоисточниот град Днипро, каде што во ракетен напад врз инфраструктурни објекти загинале пет лица, а 29 се повредени. Гувернерот на регионот, Олександр Ханжа, соопшти дека спасувачките екипи сè уште работат на терен.
Украинскиот претседател Володимир Зеленски изјави дека Русија извршила ракетен напад врз Днипро, при што биле погодени инфраструктурни објекти. Тој повторно повика Европа да биде поактивна во развојот на сопствените системи за противбалистичка одбрана.
Во одвоен напад со руско беспилотно летало врз патнички минибус во регионот Запорожје загинале двајца мажи и една жена, а осум лица се повредени, меѓу кои и седумгодишно дете.
Цел на нападот била и североисточната област Харков, каде што бомба усмртила 23-годишна жена, а уште десет лица биле повредени. Според локалните власти, оштетени биле трамвај и повеќе од 15 автомобили.
Днипро, Харков и Запорожје се меѓу најголемите индустриски центри во Украина и често се цели на руски напади од почетокот на војната, која влегува во својата петта година.
Русија засега не се огласи за нападите. И Москва и Киев меѓусебно се обвинуваат за напади врз цивилни цели, додека двете страни негираат дека намерно таргетираат цивили.
