Нови санкции за српските телевизии: РЕМ привремено забрани емисии и реклами

Додека пред седиштето на Регулаторното тело за електронски медиуми (РЕМ) во Белград се одржуваше собир во знак на поддршка на слободата на медиумите и против можното згаснување на телевизијата Информер, Советот на ова тело донесе повеќе одлуки за санкционирање на телевизиски содржини.

— реклама —

На седмата редовна седница, која траеше речиси пет часа, РЕМ одлучи привремено да го забрани емитувањето на емисијата „Дневник“ на телевизијата Курир во траење од еден ден, а на емисијата „Вести“ во траење од два дена. На телевизијата Прва ѝ беше изречена еднодневна забрана за емитување рекламни пораки.

— реклама —

Телевизијата Информер доби забрана за емитување реклами во периодот од 18 до 21 часот, во траење од пет дена, поради емисијата „Државник“, како и мерка за предупредување поради тешка повреда на прописите. Дополнително, ѝ беше забрането емитувањето на емисијата „Колегиум“ во период од 15 дена.

За телевизијата В5 од Ваљево беше изречена мерка за предупредување поради ненамерна грешка при повторното емитување на програмата „Специјал“ на Информер ТВ. Од друга страна, постапката против телевизијата К1 беше запрена откако Советот ги прифати образложенијата на нејзините претставници за емисијата „Добро утро, Танјуг“.

— реклама —

На собирот пред РЕМ, организиран по повик на Информер, присуствуваа сопственикот и главен уредник на телевизијата Драган Ј. Вучиќевиќ, претседателот на Српската напредна партија Милош Вучевиќ, како и други партиски функционери и јавни личности. Организаторите порачаа дека се противат на згаснување на Информер ТВ и бараат слобода на медиумите и примена на законите за сите.

— реклама —

Претходно, на 6 ноември, РЕМ покрена постапки против телевизиите Информер, Курир, Б92 и К1. Исто така, на 27 октомври претставници на медиумски и новинарски здруженија и организации на граѓанското општество поднесоа иницијатива за одземање на дозволата за емитување на телевизијата Информер.