„Нови случаи на заболени во Гостивар и реинфекции – пет недели власта нема решение“, вели Штерјова

Здравствената криза во Гостивар продолжува, а граѓаните и по пет недели сè уште немаат безбедна вода за пиење, обвини портпаролката на СДСМ Кети Штерјова на денешната прес-конференција.

— реклама —

Штерјова изјави дека, според информации со кои располага партијата, има нови заболени, како и случаи на реинфекција кај граѓани кои повторно се разболеле. Според неа, тоа укажува дека ризикот сè уште не е отстранет и дека причината за загадувањето не е ставена под контрола.

Од СДСМ обвинуваат дека пет недели министерот за здравство Сашо Клековски и премиерот Христијан Мицкоски даваат различни најави и ветувања дека решението е блиску, но конкретно решение сè уште нема.

— реклама —

Партијата бара одговори за информациите поврзани со квалитетот на водата, како и за тоа кој одобрил таа да се користи како техничка вода, откако биле утврдени бактерии.

— реклама —

Штерјова посочи дека до 20 август, кога Клековски најавил завршување на анализите, останува ризикот од појава на нови случаи.

СДСМ побара одговорност од надлежните институции и праша зошто Јавното обвинителство сè уште не реагирало.

„Одговорност за труењето на цел еден град мора да има – и политичка и кривична“, порача Штерјова.