Седумдесет и шестгодишна жена од Битола била жртва на телефонска измама, при што заедно со сопругот предала 7.000 евра на непознато лице, кое лажно се претставило како лекар.
Како што соопшти Министерството за внатрешни работи, на 6 февруари 2026 година во 11:25 часот во СВР Битола, оштетената пријавила дека на телефон ѝ се јавило непознато машко лице и ѝ кажало дека нејзината внука е тешко повредена во сообраќајна несреќа. Лицето тврдело дека се потребни пари за да ѝ се спаси животот.
Според пријавата, жената и нејзиниот сопруг ги собрале парите и, по договор, ги предале на лице кое ги чекало кај Саат-кулата во Битола. Подоцна, тие сфатиле дека биле измамени, откако утврдиле дека нивната внука воопшто не учествувала во сообраќајна несреќа.
Од МВР информираат дека се преземаат мерки и активности за целосно расчистување на случајот и пронаоѓање на сторителот.
