Гај де Лони, долгогодишен новинар и странски дописник на Би-би-си, соопшти дека британскиот јавен сервис нема да го продолжи неговиот ангажман по повеќе од три децении работа во медиумот.
Де Лони, кој известуваше и за трагичниот пожар во дискотеката „Пулс“ во Кочани, преку објава на „Линкдин“ информираше дека по 32 години поминати во Би-би-си, од кои 22 како странски дописник, бил известен дека неговиот договор истекува на 31 јули и нема да биде обновен.
„Во Би-би-си работев 32 години, а повеќе од две децении бев странски дописник со договор што се обновуваше секоја година“, напиша Де Лони, посочувајќи дека истата одлука се однесува и на уште четворица негови колеги.
Осврнувајќи се на својата работа, тој како пример го наведе известувањето од Кочани, веднаш по катастрофалниот пожар во ноќниот клуб „Пулс“.
„Со само еден ајфон известував во живо за главните телевизиски изданија на Би-би-си, разговарав со локалното население и подготвував прилози за телевизија, радио и онлајн платформите“, истакна новинарот.
Тој не го криеше разочарувањето од начинот на кој била соопштена одлуката.
„Немаше благодарност, немаше извинување, ниту каков било предлог како да се надмине ненадејниот прекин на приходите, а сето тоа беше соопштено само шест недели однапред“, наведе Де Лони.
Во текот на својата кариера, новинарот известувал од бројни значајни настани во регионот, меѓу кои протестите во Белград, одбележувањата во Сребреница и прославите во Загреб по финалето на Светското првенство.
И покрај прекинот на соработката со Би-би-си, Де Лони најави дека ќе продолжи активно да се занимава со новинарство, а веќе следната седмица ќе работи на нови репортажи од Албанија.
Неговата објава доаѓа во период кога Би-би-си спроведува обемна реорганизација и мерки за намалување на трошоците. Според британските медиуми, јавниот сервис планира да укине стотици работни места како дел од пошироката стратегија за финансиска консолидација.
