Мадона уште еднаш го потврди својот статус на „кралица на поп-музиката“, откако нејзиниот нов албум „Confessions II“ се искачи на првото место на листата Billboard 200.
Со овој успех, таа стана првата музичка изведувачка која во текот на 2020-тите има албум на врвот на оваа престижна листа, откако претходно тоа го постигна и во 1980-тите, 2000-тите и 2010-тите. Воедно, ова е нејзин десетти албум што стигнал до првото место на Billboard 200.
Иако не го коментираше рекордот, Мадона на својот профил на Инстаграм сподели објави со кои го одбележа успехот на новото издание.
Албумот „Confessions II“, објавен на 3 јули, е продолжение на нејзиниот успешен албум „Confessions on a Dance Floor“ од 2005 година, со кој повторно се врати на денс-звукот.
Пред неговото објавување, пејачката истакна дека албумот е „љубовно писмо до денс-музиката и до сите простори и заедници што ја создаваат и ја слават“.
„Подиумот за танцување не е одредено место или зграда. Тој е секаде каде што се собираме за да танцуваме, славиме и да се поврземе. Ви благодарам што сте дел од овој момент и што ја поддржувате мојата музика“, порача Мадона.
Нејзиниот последен албум што го освои првото место на Billboard 200 беше „Madame X“ во 2019 година, а со „Confessions II“ повторно се врати на врвот на американската топ-листа.
Во неодамнешно интервју, Мадона изјави дека танцот отсекогаш бил составен дел од нејзиниот живот.
„Танцот е во мојата ДНК, а првата музика што ја создавав беше денс-музика. Ја сакам поврзаноста што ја остварувам со луѓето кога танцуваме заедно, без разлика дали е тоа на сцена или на подиум“, рече таа.
