Последните подготвителни активности пред почетокот на изградбата на новиот булевар „Македонско-косовска бригада“ се при крај, информира градоначалникот на Скопје, Орце Ѓорѓиевски.
Ѓорѓиевски, заедно со градоначалникот на Општина Чаир, Изет Меџити, извршил увид во завршните активности пред почетокот на градежните работи.
Во првата фаза, булеварот ќе се гради на потегот од крстосницата со улицата „Џон Кенеди“ до булеварот „Босна и Херцеговина“.
Проектот предвидува современ булевар со четири сообраќајни ленти, по две во секоја насока, средишно зеленило, велосипедски патеки во двата правци и уредени тротоари.
Во рамките на проектот ќе биде изградена и нова атмосферска канализација, современо улично осветлување и заштитно зеленило од двете страни на булеварот. Предвидени се и посебни проширувања кај автобуските стојалишта, со цел да се овозможи побезбедно и поефикасно одвивање на сообраќајот.
Ѓорѓиевски посочува дека со изградбата ќе се создаде нов и уреден урбан простор, со подобра сообраќајна поврзаност и поголема безбедност за граѓаните.
„Скопје го развиваме рамномерно, во секоја општина и за секој граѓанин“, порача градоначалникот.
