Претседателот на СДСМ, Венко Филипче, на денешната прес-конференција оцени дека новото зголемување на цените на горивата ќе предизвика дополнителен бран поскапувања и уште повеќе ќе го влоши животниот стандард на граѓаните.
Според него, Владата нема план и капацитет да се справи со растот на цените и со економските предизвици со кои се соочуваат граѓаните.
„Од оваа Влада граѓаните може да очекуваат само една нова нула. Ниту план, ниту визија, ниту стратегија за решавање на секојдневните, сè поголеми проблеми. Економијата стагнира, животниот стандард опаѓа, а цените постојано растат. Новото покачување на цените на горивата ќе предизвика дополнително активирање на спиралата на поскапувања“, изјави Филипче.
Тој додаде дека, според него, Владата во изминатиот период не презела ефикасни мерки за да го спречи растот на цените, оценувајќи дека нема одговор ниту на економските предизвици, ниту на прашањата поврзани со европските интеграции.
„Видовме дека Владата не успеа да се справи со ова, ниту направи чекор да го спречи растот на цените. Европскиот пат е блокиран, а тие немаат одговор на ниту едно суштинско прашање, најмалку како да им помогнат на граѓаните кои се соочуваат со нови поскапувања“, рече Филипче.
