Вишото јавно обвинителство во Белград поднесе обвинение против две лица поради сомневање дека фрлиле рачна бомба врз куќата на познатиот пејач Здравко Чолиќ на Дедиње.
Според обвинението, осомничените се товарат за недозволено производство, поседување и употреба на оружје и експлозивни материи. Трето осомничено лице е ослободено од притвор откако против него постапката е запрена.
Истражните органи наведуваат дека двајцата обвинети се движеле со такси и електричен тротинет до локацијата, каде што едниот ја активирал и ја фрлил рачната бомба во дворот на куќата, околу раните утрински часови. Другиот осомничен, според истрагата, го надгледувал движењето во околината.
Експлозијата предизвикала оштетувања на имотот, но во моментот на нападот пејачот не бил во куќата, додека членовите на неговото семејство не биле повредени.
Во рамки на постапката биле сослушани и сведоци, меѓу кои и сосед, кој исто така пријавил оштетувања на својот имот. Пејачот претходно изјавил дека не знае кој стои зад нападот и дека нема конфликти со никого.
