Основното јавно обвинителство Скопје поведе постапка против 44-годишен скопјанец осомничен за кривичното дело предизвикување општа опасност, откако вчера напладне запалил две дипломатски возила пред Амбасадата на Република Бугарија во Скопје.
Според обвинителството, на 15 јуни околу пладне на булеварот „Митрополит Теодосиј Гологанов“, осомничениот предизвикал пожар со кој создал значителна опасност за животот и телото на луѓето, како и за имот од големи размери.
Истрагата покажала дека тој најпрво излегол од својот дом, се качил во автобус и пристигнал во центарот на Скопје. Од бензинска пумпа во близина на Бугарската амбасада наполнил бензин во пластично шише, по што се упатил кон двете паркирани дипломатски возила.
Откако ги полеал автомобилите со бензин, ги запалил со запалка, а веднаш потоа го напуштил местото на настанот.
Од Обвинителството велат дека при оценката за мерката за обезбедување биле земени предвид видот и тежината на кривичното дело, фактот што било извршено врз дипломатски возила, како и околноста дека настанот се случил среде ден во центарот на градот, кога фреквенцијата на луѓе и возила е голема.
Поради тоа, јавниот обвинител до надлежниот суд доставил предлог за определување мерка притвор за осомничениот.
