Обвинителството ја следи состојбата со Алта банка, но сè уште е рано за истрага, тврди Савески

Државното јавно обвинителство ја следи состојбата поврзана со Алта банка, но засега не може да потврди дали ќе отвори истрага. Државниот јавен обвинител Ненад Савески вели дека институцијата ќе реагира доколку се утврдат индиции за кривично дело, но оценува дека е прерано за конкретни најави.

Савески ова го изјави денеска по седницата на Советот на јавните обвинители, одговарајќи на новинарски прашања за случувањата околу Алта банка АД Битола, чиј мнозински сопственик е Алта банка АД Белград од Србија.

— реклама —

Тој посочи дека Обвинителството ја набљудува ситуацијата и дека ќе постапи доколку утврди поврзаност со кривичноправен настан. Во однос на евентуалната комуникација со српските правосудни органи, каде што веќе се води истрага за работењето на банката, Савески рече дека досега не биле побарани информации за конкретниот случај. Сепак, нагласи дека соработката со српското обвинителство е добра и дека размената на податоци би се одвивала без пречки доколку се појави потреба.

Случајот е во фокусот на јавноста во Србија и Македонија, откако Народната банка на Србија на 31 октомври ѝ ја одзеде дозволата за работа на Алта банка, а на 3 ноември беше отворена стечајна постапка.

— реклама —

Сопственикот на банката, Давор Мацура, беше уапсен на 2 ноември, а по сослушувањето пред Обвинителството за организиран криминал, неговиот адвокат соопшти дека ги отфрлил наводите од кривичната пријава. На 4 ноември, Вишиот суд во Белград му одреди 30-дневен притвор на Мацура и на уште двајца вработени во банката.

— реклама —

Според сомневањата на српските истражни органи, Мацура ја злоупотребил службената положба и од трезорот на банката изнел околу 45 милијарди динари, односно повеќе од 380 милиони евра. Двајцата вработени се осомничени дека му помогнале во извршувањето на делото.

Случајот има последици и за Македонија, бидејќи Алта банка АД Белград од минатата година е мнозински сопственик на Алта банка АД Битола, по преземањето на Стопанска банка АД Битола.

— реклама —

По случувањата во Србија, Народната банка на Македонија воведе привремена администрација во битолската банка и ограничувања за располагањето со средствата. Физичките лица можат неделно да подигаат готовина и да плаќаат со картички до 10.000 денари, додека внатрешните трансфери кон други физички и правни лица во рамките на банката остануваат неограничени. Од денеска, преку посебни шалтери, граѓаните што немаат платежни картички ќе можат да подигнуваат до 20.000 денари неделно.

Во Собранието треба да се одржи и надзорна расправа за случајот, на барање на опозицијата. СДСМ во повеќе наврати побара од Обвинителството да отвори истрага против премиерот Христијан Мицкоски и гувернерот на Народната банка, Трајко Славески, обвинувајќи ги за одговорност за влегувањето на Алта банка на македонскиот пазар.