Поради зголемената опасност од шумски пожари, од 1 септември повторно стапува во сила целосната забрана за движење во шумите и шумското земјиште со кое стопанисува ЈП „Национални шуми“.
Одлуката, донесена со согласност на Министерството за земјоделство, шумарство и водостопанство, ќе важи од 1 до 30 септември 2026 година, во периодот од 00:00 до 24:00 часот.
Забраната се однесува на целата територија со која управува ЈП „Национални шуми“, а движењето ќе биде дозволено само со писмено одобрение, издадено од надлежните подружници на претпријатието.
Од забраната се изземени Министерството за внатрешни работи, Министерството за одбрана, Шумската полиција, Центарот за управување со кризи, Дирекцијата за заштита и спасување, Државниот инспекторат за шумарство и ловство, ЈП „Национални шуми“, како и субјектите и лицата кои вршат шумскостопански и други активности поврзани со заштитата на шумите.
За спроведување на забраната се задолжени вработените во ЈП „Национални шуми“ кои вршат заштита, Државниот инспекторат за шумарство и ловство, Шумската полиција и МВР.
Од претпријатието појаснуваат дека забраната не се однесува на парк-шумите и националните паркови. За условите за движење во овие подрачја, граѓаните треба да се информираат кај правните субјекти кои управуваат со нив.
