Владата, на предлог на Министерството за транспорт, донесе одлука за ограничување на пловидбата на пловни објекти на Охридското, Преспанското и Дојранското Езеро, со цел зголемување на безбедноста на капачите и учесниците во водниот сообраќај.
Според одлуката, пловидбата на скутери ќе биде ограничена во периодот од 1 јули до 31 август 2026 година, секој ден од 11 до 19 часот.
Дополнително, се воведуваат ограничувања и за пловидбата на чамци. Од 3 јуни до 31 август, чамците нема да смеат да пловат во периодот од 21 до 5 часот. Во септември, ограничувањето ќе важи од 20 до 6 часот, додека во октомври, пловидбата ќе биде забранета од 19 до 6 часот.
Од Министерството за транспорт посочуваат дека мерката е донесена со цел намалување на ризикот од несреќи, заштита на човечките животи и обезбедување непречено користење на езерските води.
Воедно, најавени се засилени контроли од надлежните служби, а за непочитување на ограничувањата ќе следуваат санкции согласно законските прописи.
Надлежните институции апелираат до сопствениците и управувачите на скутери и чамци да ги почитуваат правилата за пловидба, означените безбедносни зони и насоките на службите задолжени за безбедност на езерата.
