Од 9 ноември се менува начинот на плаќање: нови ознаки за сметките и поинакви уплатници

Граѓаните и компаниите во Македонија од 9 ноември ќе треба да се приспособат на неколку новини во банкарското работење. Денарските платежни сметки ќе добијат ознака во меѓународен ИБАН-формат, досегашните уплатници ќе бидат заменети со нови обрасци, а ќе се воведат и поинакви шифри за означување на плаќањата.

Станува збор за промени во домашниот платен промет, кои ги спроведуваат банките согласно со законските и подзаконските прописи. Според Македонската банкарска асоцијација, целта е усогласување на податоците и поедноставна и поефикасна обработка на платежните трансакции.

— реклама —

Една од главните новини е додавањето на ознаката „MK07“ пред постојниот број на денарската сметка. Со тоа таа ќе биде прикажана во ИБАН-формат, но граѓаните нема да добијат нова сметка ниту ќе треба да ги префрлаат парите. Се менува само начинот на нејзино означување.

Банките ќе ги приспособат своите системи за електронско и мобилно банкарство. Од ПроКредит банка информираат дека клиентите ќе можат да го внесуваат бројот на сметката на досегашниот начин, по што системот автоматски ќе го претвора во ИБАН-формат. Сепак, корисниците треба да ги следат упатствата од својата банка.

— реклама —

Промени ќе има и кај платните налози. Досегашните обрасци ПП10, ПП30, ПП40, ПП50 и ПП53 ќе бидат заменети со нови стандардизирани налози, достапни во хартиена и електронска форма. Новите обрасци ќе имаат поинаков изглед и распоред на податоците, а при електронско пополнување ќе треба да се внесуваат и дополнителни информации, како адреса, град и држава на налогодавачот или примачот.

— реклама —

Се менува и начинот на означување на целта на плаќањето. Наместо досегашните нумерички ознаки, ќе се користат четиризнаковни алфанумерички шифри, усогласени со меѓународниот стандард ISO 20022. За налозите што ќе се извршуваат од 9 ноември ќе треба да се избере соодветната нова шифра.

За трансакциите во странска валута, како и за денарските плаќања во кои едната страна е нерезидент, ќе продолжат да важат посебните трицифрени шифри предвидени за платежни трансакции со странство.

— реклама —

Посебно внимание на промените треба да обрнат компаниите што користат сметководствени програми и системи за автоматско испраќање налози, бидејќи кај нив може да бидат потребни дополнителни технички приспособувања.

Од Македонската банкарска асоцијација препорачуваат граѓаните и фирмите навреме да се информираат кај своите банки за новиот начин на прикажување на сметките, користењето на платните налози и изборот на соодветните шифри.