Од денеска возачите кои имаат Б категорија ќе можат да управуваат мотоцикл до 125 cm³, но само доколку претходно поминат задолжителна четиричасовна теоретска обука, информира Министерството за внатрешни работи.
Станува збор за нов Правилник со кој се уредува начинот на спроведување на обуката за управување со мотоцикл од категоријата „А1“ со автоматски менувач и моќност до 11 kW.
Од МВР нагласуваат дека не смее да се управува со мотоцикл до 125 cm³ без претходно завршена обука и издадена потврда од автошкола.
„Обуката трае четири часа и опфаќа клучни теми за безбедноста: заштитна опрема, контрола и стабилност на мотоциклот, превоз на сопатник и справување со ризици на патот“, велат од МВР.
По завршувањето на часовите, автошколата ќе издава официјална потврда во А5 формат, а за секоја издадена потврда ќе го известува МВР, каде ќе се води евиденција врз основа на податоците доставени директно од автошколите.
