Познатиот специјалист инфектолог проф. д-р Вело Марковски ќе поднесе кандидатура за претседател како независен кандидат на претстојните претседателски избори, соопшти неговиот тим најавувајќи ја за утре промоцијата на неговата кандидатура.
Марковски дипломирал на медицинскиот факултет во Скопје во 1983 година, од 1986 до 1992 година работел како лекар во службата за Итна медицинска помош во Скопје, а потоа до 2010 како лекар специјалист во Инфективната клиника при клиничкиот центар во Скопје. Од 1999 до 2002 година бил директор на ЈЗУ Клиника за инфективни болести и фебрилни состојби.
Во поканата уште се наведува дека во таа функција ќе промовира и своја веб-страница.
Други информации не се споделени како тие дали веќе разговарал за партиско - политичка поддршка, ниту зошто решил самостојно да ја најави својата намера да учествува на изборите за шеф на македонската држава.
Марковски беше чест гостин на медиумите особено во време на ковид пандемијата кога привлече внимание со своите различни погледи за оваа заразна болест, како и за методите за изолација и карантин, но и за самиот третман на лекување на пациентите.
Претходно, против него беше водена и судска постапка за илегални археолошки истражувања за стекнување на личен профит. Тој беше и член на Извршниот комитет на ВМРО-ДПМНЕ.
