Од понеделник полесно до парите во „Алта банка“: Лимитот расте на 15.000 денари, се отвораат шалтери во Струмица и Тетово

Клиентите на „Алта банка“ АД Битола од понеделник, 9 ноември, ќе можат да располагаат со поголем износ преку платежните картички, а ќе бидат отворени и шалтерите во Струмица и Тетово. Народната банка најави и целосна исплата на новите приливи од плати, пензии и социјална помош доколку средствата се уплатени од институции или компании што имаат сметки во други банки.

— реклама —

Неделниот лимит за подигање готовина и плаќање со картички се зголемува од 10.000 на 15.000 денари. За клиентите кои немаат платежни картички, исплатата на шалтерите останува ограничена на 20.000 денари во период од две недели.

Во Битола шалтерите работат трет ден, а утрово пред филијалата немало поголеми гужви. Средства подигнувале пензионери и корисници на социјална помош. За овие категории клиенти од другите градови е организиран бесплатен превоз. Првиот автобус од Прилеп пристигнал утрово, а во текот на денот биле најавени и автобуси од Охрид и Ресен.

— реклама —

Дел од граѓаните изјавиле дека исплатата се одвивала брзо и без поголеми задржувања.

— реклама —

Според податоците на Народната банка, во првиот ден од работењето на шалтерите биле услужени 556 корисници, кои во просек повлекле по 19.000 денари. Вчера, кога започнала исплатата на социјалната помош, биле услужени 660 нејзини корисници.

Целосното повлекување се однесува на новите приливи од плати, пензии и социјални трансфери што пристигнуваат од други банки, а не на сите средства што клиентите веќе ги имаат на своите сметки.

— реклама —

Од Народната банка нагласуваат дека „Алта банка“ Битола продолжува да работи, не е во стечај и не ѝ е одземена дозволата за работа. Во банката е воведена привремена администрација, а според оценката на регулаторот, таа е ликвидна и високо капитализирана.