Македонскиот рапер и музичар Марко Маринковиќ – Слаткаристика преку социјалните мрежи сподели емотивна порака за својата долгогодишна борба со говорна потешкотија и за улогата што музиката ја имала во неговиот живот.
Тој објасни дека неговата состојба се манифестира како губење на ритамот на говорот и откри дека како дете долго време верувал дека неговите зборови немаат доволна вредност.
„Како дете, долго време мислев дека моите зборови не вредат доволно. Затоа почнав да пишувам стихови уште од моментот кога научив да држам молив во рака“, напиша Слаткаристика.
Тој додава дека подоцна спасот го пронашол во ритамот и музиката, кои постепено станале не само негова професија туку и животна мисија.
Во објавата музичарот зборува и за предрасудите и потценувањата со кои се соочувал низ годините, нагласувајќи дека често бил изложен на неразбирање од околината.
„Цел живот сум се соочувал со предрасуди, потценувања и пречки од општеството, особено од оној површен и неинформиран слој“, наведува тој.
Сепак, Слаткаристика порачува дека секоја пречка може да се претвори во мотивација и инспирација. Според него, неговата приказна може да им даде надеж на децата што се соочуваат со слични предизвици, како и на нивните родители.
„Јас мојата пречка ја надминав кога почнав да комуницирам преку музика. Денес сум среќен што утре некој мал Марко ќе знае дека неговиот глас може да биде чуен и моќен, а некои други Лиле и Боро ќе знаат дека нивното дете може да биде сакано, прифатено и почитувано“, напиша музичарот.
На крајот од објавата, тој посочи дека музиката и ритамот и денес му помагаат во комуникацијата, шеговито забележувајќи дека кога има мелодија во позадина зборува „како спикер“.
