Од утре почнува парното греење поради пад на температурите

Поради најавените пониски температури, АД ЕСМ од утре, 13 октомври, ќе започне со испорака на топлинска енергија до корисниците приклучени на системите за греење со кои управува компанијата, преку ЕСМ Снабдување со топлина и подружницата „Енергетика“.

— реклама —

Иако официјалниот почеток на грејната сезона е предвиден за 15 октомври, регулативата овозможува греењето да започне и порано доколку прогнозираната средна дневна температура за наредниот ден изнесува 12 Целзиусови степени или помалку.

Според податоците на Управата за хидрометеоролошки работи (УХМР), за 13 октомври се предвидува средна дневна температура од 12 степени, со што се исполнети законските услови за предвремен почеток на испораката.

— реклама —

Од ЕСМ посочуваат дека во текот на октомври и првата половина од ноември интензитетот на греењето ќе се приспособува на надворешните температури. Во периодите кога времето ќе биде потопло, испораката ќе се намалува или привремено ќе се прекинува, додека при заладување греењето автоматски ќе се активира.

— реклама —

До 15 октомври компанијата секојдневно ќе објавува информации за испораката на топлинска енергија на својата интернет-страница.

Истовремено, од АД ЕСМ апелираат до граѓаните што поскоро да ги завршат сите интервенции на внатрешните инсталации за греење.

Заедниците на сопственици, пак, треба да обезбедат непречен пристап на службените лица до топлинските потстаници, редовно снабдување со електрична енергија и навремено подмирени сметки за струја во заедничките простории.