Од утре затворени дивите приклучоци на автопатот Охрид–Кичево

СВР Охрид информира дека од утре, 29 април 2026 година, за сообраќај ќе бидат затворени сите споредни влезови и излези кои привремено функционираа на автопатската делница Охрид–Кичево, во близина на селата Требеништа и Мешеишта, во општина Дебрца.

— реклама —

Со оваа мерка, како што посочуваат од полицијата, се воведува единствен режим за безбедно приклучување на автопатот. Возачите ќе мора исклучиво да го користат пристапниот пат кај клучката во близина на охридскиот аеродром „Св. Апостол Павле“, до кој водат споредни патишта надвор од автопатот.

— реклама —

Од СВР Охрид апелираат до сите учесници во сообраќајот строго да се придржуваат до новите насоки и да ја почитуваат поставената хоризонтална и вертикална сигнализација.

На терен ќе има засилено полициско присуство.

— реклама —

„Апелираме до возачите строго да се придржуваат до овие насоки, да ја почитуваат сигнализацијата и насоките на полициските службеници кои од утре ќе вршат интензивни сообраќајни контроли на овој патен потег со цел контрола и мерки кон возачи кои ќе се обидат непрописно да се вклучат и ќе го загрозат автопатскиот сообраќај“, велат од СВР Охрид.

Полицијата најавува санкции за сите кои ќе се обидат да се вклучат на автопатот на недозволени места.